20 Agustus 2010

CERMIN

JADI PNS

Kancang langkah Mangkuto pai ka tampek Pak Sidi, Mangkuto ba mukasuik ka maminjam oto Pak Sidi untuak manjapuik anaknyo ka bandara nan baru pulang dari parantauan. Si Umar anak pak Mangkuto nan tongga babeleang, baru sajo manyalasaian S1nyo di UGM, nasib baik dek si Umar, sakali ikuik tes SPMB lansuangnyo luluih di UGM. Sasampainyo di rumah pak Sidi, Mangkuto lansuang jo mangarucuih masuak kadalam rumah Pak Sidi, lupo nan jo salam.

“Hah! a nan tajadi dek angku ko? Manyarucuih jo masuak ka rumah ambo, indak lo ba salam, dikaja antu angku? Tanyo Pak Sidi ka Mangkuto.

“Maaf kan ambo Pak Sidi, ambo takaja kini a, si Umar anak ambo manalepon tadi, katonyo inyo pulang kampuang kini…” kato Mangkuto sambia tarangah duduak di lantai dek kapanekan.

“ Tu apo urusannyo jo ambo, anak angku nan ka pulang manga rumah ambo nan basarang?tanyo Pak Sidi nan kaheranan.

“indak bantuak itu do pak, ka manga lo ambo manyarang rumah apak. Ambo datang kasiko ba mukasuik maminjam oto Pak Sidi untuak manjapuik anak ambo si Umar di Bandara” jawek Mangkuto.

“Pakai jo lah dek angku oto ambo tu, asa…” sabalum salai pak Sidi bakato manyalo lah Mangkuto.

“Asa apo pak?kok ka mambaih lo, jujur ambo pak, ambo sadang ndak bapitih kini pak. Utang ambo ka si Tanjidin jo alun tabaih lai do pak, masak ka bautang lo ambo ka apak? Salo Mangkuto.

“ Itu maleh ambo ka angku, ambo alun salasai mangecek lah angku salo jo, mukasuik ambo tu, asa angku nan mambali minyak oto tu, bao lah dek angku oto ambo tu” jawek Pak Sidi

“Ooo…kok baitu mukasuik Pak Sidi sanang jo lah hati ambo, kok ka bali minyak Alhamdulillah lai jo sampai pitih ambo” jawek Mangkuto

Sambia manunggu pak Sidi kalua dari kamar, Mangkuto maliek-liek foto-foto nan tagantuang didindiang ruang tamu Pak sidi. Ndak lamo sasudah tu, kalua lah Pak Sidi dari kamarnyo nan indak jauah dari ruang tamu.

“ko kunci oto ambo” kato pak Sidi manyarahan kunci oto ka tangan Mangkuto,”tolong angku jago elok-elok oto ambo ko, jan angku lupo maisi minyaknyo”tambah Pak Sidi.

“Iyo pak, insyaAllah ambo jago oto apak jo saganok jiwa raga ambo” jawek Mangkuto sarato jo galak sengeangnyo.

Bagageh lah mangkuto pai ka garasi pak Sidi untuak maambiak oto, sasudah dibukaknyo pintu oto,lansuang ma hambuah nyo ka ateh oto, diiduik an nyo masin oto tu, lansuang nyo gas manuju rumahnyo. Sasampai nyo dirumah,turunlah si Mangkuto dari oto, sambia basorak mamanggia bininyo si Baeram.

“ Baeram…O…Baeram…” pakiak Mangkuto.

“alun jo siap adiak manih uda ko lai do? Tapi awak pai manjapuik si Umar. Alah uda pinjam oto ka Pak Sidi, capeklah basegeh lah Baheram lai!” pintak Mangkuto.

“iyo da, tunggu sabanta!” baleh Baeram.

Sambia manunggu Baeram kalua, pangana Mangkuto lah tabang ka anaknyo. Mangkuto baharok bana Si Umar ka manjadi PNS di kampuangnyo, takanalah apo nan di katokan konco-konconyo di lapau Tanjidin tadi malam, kalau nio hiduik bakacukuikan la jadi lah PNS, karajo sanang, kok ndak masuak gaji ndak ka bakurang, sampai bauban gaji pansiun tetap mangalia ka tangan. Kok ka mati indak manyusahan urang. Karano pakecekan konco-konconyo tu, tabayang lah dek Mangkuto sanangnyo hiduik Si Umar kalau manjadi PNS.

Mulai kini batekad lah Mangkuto manyuruah anaknyo Si Umar manjadi PNS. Buliah ndak samo nasib Si Umar jo hiduiknyo kini. Mangkuto bakarojo jadi kuli angkek di Balai, sadangkan si Baeram bajaga ketek-ketek di muko rumahnyo. Dari situlah biaya Si Umar sakolah, kadang ndak jarang pulo Mangkuto maminjam pitih kasinan-kamari untuak kadikiriman ka Si Umar. Kalau Si Umar jadi PNS bararti inyo bisa “mambangkik batang tarandam”, baitulah pangana Mangkuto. Sasudah Baeram masuak, tanpa baso-basi malajulah oto kijang Kapsul punyo Pak Sidi manuju Bandara Internasional Minangkabau.

Sasudah basobok jo bujang tungga babeleangnyo, malapeh taragaklah Mangkuto jo Baeram ka Si Umar, nan salamo tigo satangah tahun ndak pulang-pulang.Basilang tigo hari, basiaplah Mangkuto manyampaian apo nan di bayangannyo tentang PNS. Duduaklah Mangkuto disampiang Si Umar nan sadang mambaco buku. Di pandang-pandangnyolah anaknyo, sambia bapikia kiro-kiro lai namuah anaknyo tu manjadi PNS.

“Mar…kiro-kiro kama pangana Umar salanjuiknyo? Tanyo Mangkuto mambukak percakapan.

“Pangana… makasuik Ayah karajo? Baleh Si Umar.

“Iyo…itu makasuik Ayah, nio karajo apo Umar ? Jawek Mangkuto.

“Rencana Umar ka malanjuikkan S2 ka Australia Ayah, sabalum pulang Umar mancalonkan diri untuak mandapekan beasiswa ka sinan, baa manuruik ayah lai katuju? Kato Umar.

Tasintaklah Mangkuto mandanga jawek anaknyo. Ndak disangkonyo jawek samacamtu kalua dari muluik anaknyo. Tapikia dek Mangkuto bara banyak pitih nan harus ka disiapannyo untuak anaknyo pai baraja ka Australia. Tambah karehlah hati Mangkuto untuak mamujuak anaknyo manjadi PNS.

“Ayah satuju samo rencana Umar, tapi indak tapikia dek Umar biayanyo kasitu? sadangkan Umar tau karajo ayah bantuak iko. Manuruik ayah alangkah baiaknyo kalau Umar ikiuk tes CPNS bulan bisuak. Kalau Umar jadi PNS hiduik Umar sanang, ndak sarupo ayah manjadi kuli di Balai. Umar bisa “mambangkik batang tarandam”, itu nan di kecekan kawan-kawan Ayah wakatu Ayah minum kopi di lapau Tanjidin”. Jawek Mangkuto

“Iyo Yah…Umar tau makasuik Ayah rancak, tapi Umar ndak lo namuah manyio-nyioan kesempatan sakali saumua hiduik, patang Umar di talepon dek dosen Umar di UGM katonyo Umar mandapekkan beasiswa ka Australia. Ayah ndak paralu takuik pakaro dana, karano iko beasiswa. Bahkan Umar disitu diagiah fasilitas. Jadi, awak ndak paralu mambaih apo-apo, paliangan mamikian balanjo jo makan. Umar takana hadist Nabi nan mangecekan bahwa nan kadibao mati tu ado tigo, nan partamo amalan jahiriah, kaduo doa anak shaleh, dan nan katigo ilmu nan bermanfaat. Kalau Umar pai ka Australia manambah ilmu, mungkin pulang dari situ Umar bisa labiah bermanfaat untuak urang banyak. Ayah ndak usah takuik pakaro karajo, karano Umar lah ditarimo karajo di Perusahaan di Yogja, InsyaAllah Umar lah bisa mangiriman pitih untuak Ayah jo Bundo tiok bulannyo, karano Umar sakolah sambia karajo” ciloteh panjang Umar manjalehan

Gadang hatilah Mangkuto mandanga jawek anaknyo nan samacam tu, ndak takana deknyo tentang PNS nan dibangga-banggakan ka anaknyo tadi. Ndak taraso tajatuah aia mato Mangkuto dek sanang hati jo gadang bangga ka anak tongga babaleangnyo. Dalam pangana Mangkuto kini, ndak sio-sionyo manyakolahan tinggi-tinggi anaknyo, bialah lindang tandeh badan ko asakan anak bisa sakolah. apo lai mandanga Si Umar manyabuikan hadist Nabi tadi ndak tahinggo gadang hati Mangkuto, dipaluaknyolah anak kebanggaanyo tu.

*TaMat=



Tidak ada komentar:

Posting Komentar